Í gær, fimmtudaginn 3. júní, kl. 17 tilkynnti mennta- og menningarmálaráðherra Katrín Jakobsdóttir um hverjir hlytu Nýræktarstyrki Bókmenntasjóð árið 2010. Að því loknu lásu Nýræktendur úr verkum sínum. Þetta er í þriðja sinn sem Nýræktarstyrkjum er úthlutað úr Bókmenntasjóðnum. Athöfnin fór fram í Nýlistasafninu, Skúlagötu 28.
Nýræktarstyrkjum er ætlað er styðja við útgáfu á nýjum íslenskum skáldverkum sem hafa takmarkaða eða litla tekjuvon en hafa ótvírætt menningarlegt gildi. Undir þetta svið falla skáldverk í víðri merkingu þess orðs til dæmis sögur, ljóð, barnaefni, leikrit, eða eitthvað allt annað, og leitað var eftir breidd og fjölbreytni í umsóknum.
Umsóknum um Nýræktarstyrkjum hefur fjölgað mjög á milli ári frá því að þeim var fyrst úthlutað árið 2008, en þá bárust 9 umsóknir um 5 styrki, hver að upphæð 200 þúsund. Árið eftir, 2009, bárust 27 umsóknir um 6 styrki. Að þessu sinni eru Nýræktarstyrkir fimm talsins, að upphæð tvö hundruð þúsund krónur hver eins og áður, en alls bárust 39 umsóknir um styrkina í þetta sinn.
Styrkina að þessu sinni hljóta tvær ljóðabækur, örsagnasafn, barna- og unglingabók og eitt tímarit:
Röskva
(barna- og unglingabók)
Höfundur : Hildur Margrétardóttir
Útgefandi: ófundinn
Lömbin í Kambódíu (og þú)
(ljóðabók)
Höfundur: Jón Bjarki Magnússon
Útgefandi: Nýhil
Grimm ævintýri
(ljóðabók)
Höfundur: Ásgeir H. Ingólfsson
Útgefandi: Nýhil
Teiknað með blóði
(örsögur)
Höfundur: Bjargey Ólafsdóttir
Útgefandi: ófundinn
Furðusögur
(tímarit: fantasíur, vísindaskáldskapur og hryllingur)
Ritstjórn: Alexander Dan Vilhjálmsson, Ólafur Sindri Ólafsson og Hildur Knútsdóttir.
Útgefandi: Andlag útgáfa
Finna má texa og frekari upplýsingar um Nýræktendur Bókmenntasjóðs og önnur skáld af yngri kynslóð, á þrítyngdu bókmenntavefsíðunni fict.is.
Bakhjarl síðunnar er Sagenhaftes Island, en markmið fict.is er að kynna nýjar og frumlegar raddir í íslenskum skáldskap. Þar má finna upplýsingar um fjölmörg skáld, og brot úr verkum þeirra, sem eru af ýmsum toga – til dæmis ljóð, örsögur, smásögur, skáldsögur, mynd- og myndbandsljóð.